ثريا جبران تصرح : اقسم بأن أحول مآتمكم وجنائزكم الى مهرجانات لا تنتهي
بمسرحها الفخم -عفوا- اقصد مكتبها الفخم داخل مبنى وزارة الثقافة استقبلتني السيدة ثريا جبران بإبتسامتها المعهودة التي عادت بي سنوات عدة الى تلك الوصلة الاشهارية التي كانت تظهر فيها معالي الوزيرة - الممثلة المسرحية اذاك-وهي بجانب قنينة البوطاكاز تقدم النصائح للمشاهدين ، بقفطانها المغربي وهي تجسد دور تلك المرأة المغربية " البْلدية " التي ينحصر دورها داخل "الكوزينة" نهارا وعلى الناموسية ليلا ، صورة نمطية كان يحرص النظام على ترسيخها بالادهان سواء عبر شاشة التلفزيون او داخل صفحات التلاوة المدرسية ايضا..حينما دخلت للمكتب وجدت صورة مغايرة للسعدية اقطيطيف التي كنت اراها على الشاشة وبالمناسبة فالسعدية اقطيطيف هو الاسم الحقيقي لثريا جبران وقد كانت هده الشكلية هي مدخلي لحوار مع الوزيرة الجديدة ضمن التشكيلة الحكومية التي يقودها الوزير الاول عبيبيس الفاسي والدي سنعمل على محاورته في مناسبة لاحقة ..وفيما يلي تفاصيل اللقاء الدي جمعني بمعالي السعدية التي اسعد الله عليها بحقيبة لم تكن تحلم بها :رفيق الدرب : معالي الوزيرة بداية اود ان اشكرك على قبولك لطلبي باجراء حوار مع سيادتكم وخصي بأول خروج اعلامي رسمي لكم
ثريا جبران : (بصوت خشن كادت معه اسنانها ان تقفز بوجهي ) الله يقدرنا نكونوا عند حسن ظنكم بنا..الله يقدرنا..الله يقدرنا..الله يقدرنا ..تفضل آرا ما عندك راه عندي حوار مع باري ماتش من هنا ساعة
رفيق الدرب : السعدية اقطيطيف او ثريا جبران وجهان لعملة واحدة هي وزيرة الثقافة..المعروف على وزرائنا انه كتكون عندهم دوبل ناسيوناليطي ، دوبل وجه ،اليوم نرى انك تمثلين صرعة اخرى من صرعات الاستوزار بتوفرك على دوبل حالة مدنية فما السر وراء دلك واي الاسماء هي اقرب الى قلبك ؟
ثريا جبران : اللي عندو وجه واحد الله يعطيه فيه الجربة..كاع الفنانين عندهم جوج سميات..واش كتعرف مثلا شكون هي" فا طمة ابراهيم البلتا جي" جاوبني يلاه
رفيق الدرب : ما عرفتهاش..ياكما الاسم الثالث ديالك
ثريا جبران : خلينا من لملاغة آ خويا رفيق..هدا راه هو الاسم الحقيقي ديال ام كلثوم..وبالتالي فحتى انا شأني شأن كاع الفنانات من حقي نغير سميتي خصوصا ادا كان هو السعدية .. (في محاولة للتنكيت ) و آجي بعدا واش كاين شي وزيرة كيكون سميتها السعدية
رفيق الدرب : ماشي مشكل راه مستشارة ديال المليك وسميتها زوليخة..المهم نمرو للسؤال الثاني شنو كان احساسك من بعد ما تم تسميتك لوزارة الثقافة ؟
ثريا جبران : ما كنتش منتظراها بصراحة..انا كنت ضاربة احساب آخر..تصور اني آخر ايامي وليت كنفرق لوراقي ديال الانتخابات مع اللي يسوى واللي ما يسواش..السعدية اللي ساكناني خدات 50 درهم مقابل توقف مع نبيل بن عبدالله ف تمارة..غَريبْ كنت ضاربة حساب ساعة صدقت ف حساب..
رفيق الدرب : (مقاطعا) آش من حساب كنتي ضاربة ؟
ثريا جبران :قلت مع راسي آجي نخدم مع هاد المرشحين لعل وعسى ينجح شي حد فيهم وف حال ولاّ وزير ما ينساناش واخا غير شي بلاصة لراجلي اللي كالس ف الدار لا خدمة لا ردمة..تصور يا خويا رفيق الدرب شديت الكار للرحامنة مع الستة ديال الصباح ومشيت بلا فطور وما نعاودش ليك نوّضت الروبلة تمّـاكين..غير شافوني الناس قالو صافي ما غاديين نصوتو الا على صاحب المليك داك الصلع اللي خدامة معاه مولات الاشهار ديال" آناري جابها ف راسو"
رفيق الدرب : الطريف ف الامر هو انه ما جابهاش ف راسو وكيبان لي راك انت اللي واقيلا غادة تجيبها ف راسك ادا بقيتي تابعة غير لعيوط والمهرجانات وتقرقيب لمقوصة وتزنزين لبنادر
ثريا جبران : راه هادي هي الثقافة اللي باغيها الشعب..بنااااادم مبّوق خاصو غير فين يشطح وكيسان الدكوك اما الشعر والادب وداك التخربيق راه تيجيب النعاس..انا بغيت شعار وزراة الثقافة ف عهدي يكون هو " تحدى الملل "
رفيق الدرب : ألا ترين معي ان المغرب بغا يقلد زعما الجمهورية البرازيلية الدي يحمل حقيبة وزارة الثقافة فيها مطرب البوب دو الشعر االمكردد "جيليبرتو جيل" ولدلك قاموا باختيارك لتحمل هده المسؤولية باش يكونوا أَ لاموض ويبانو انهم متابعين آخر الصرعات الدولية ف عالم الاستوزار
ثريا جبران :علاش واش جيليبرتو احسن مني ؟ ادا كان هو شعرو مكردد انا راه صلعوا ليَ هاد راس بالزيرو ..وزايدون راني حتى انا ما دوزتش قليل وراني مناضلة وصاحبة مبادئ وحاصلة على جوائز عالمية كثيرة وكنتعتبر من النخبة المثقفة ديال المغرب
رفيق الدرب : باحدى حواراتك السابقة كنت قد اجبتي على سؤال حول عدم استمرارك داخل الفرقة الوطنية للمسرح التي لم تمارسي بها أكثر من سنتين بين 1973 و1975.. فكان جوابك كالتالي : لقد وجدت أن هذا ليس هو الاختيار الصحيح أن أكون في فرقة تابعة للدولة، فكل الاعمال المفروضة عليك، اعمال تمدح النظام، وجدت انها مضيعة للوقت. اليوم معالي الوزيرة تقبلين بحقيبة داخل حكومة جوطابل و تُمرمدين يد الملك تقبيلا فما الدي تغير اليوم بهدا النظام ؟ أوليست الحكومة كانت ولا تزال مجرد ديكور وآلة لتنفيذ قرارات تصنع خارج دوائرها في مختلف القطاعات والمجالات؟
ثريا جبران :هداك عقل الصْغر ما تحاسبونيش عليه..ثم التجارب اتبثث انه بالمغرب لا يمكن التوجه نحو المستقبل دون ان تتملق النظام..واش بغيتيني نبقا خْراجة !! هاهي نوال المتوكل باقيا تنعقل عليها بشعكوكتها وهي كتجري غافحال يلا لبارح ها هي اخويا دابا ولات وزيرة..والله ينصر سيدنا اللي اعطاني هاد الفرصة باش نمثل دور العمر بهاد المسرحية اللي من المتوقع انها تدير بُم ف المغرب
رفيق الدرب : الله يحفظنا من " بٌم" والتفرقيع..هههه . معالي الوزيرة الثقافة ببلد يعاني غالبة مواطنيه من آفة الجهل والامية قد تعتبر شيئا كماليا مقارنة برغيف الخبز الدي يعد من اولويات الاولويات ، وعليه فبالنسبة للمواطن العادي وجود مثل هكدا وزارة من عدمه سوف لن يغير من الامر شيئا او بعبارة ادق وجودها سوف لن يفيده في شيء...فالثقافة آخر ما يمكن ان تفكر فيه حكومة جائعة لشعب جائع
ثريا جبران : المهم نشبعو احنا يا رفيق ..وقل ربي ارحمني عااااااااد ارحم والديَ..وهاوجهي ها وجهك ادا ما لقيتيش عندي لحناك من هنا لـ خمس سنين الجاية فين ما تشوفني ادفل عليَ..و آجي بعدا واش فايت لك سمعتي ديك النكتة ديال الجماني مع الحسن الثاني فاش قاليه سيدنا راني بغيتك تديرني وزير للبترول وقاليه سيدنا مستغربا ولكن احنا ما عندناش البترول فرد عليه الجوماني وعلاش عندنا وزير العدل واخا ما كاين عدل ف لبلاد..يعني ا سي رفيق الدرب الاستوزار هو راتب مريح والبريمات والتمخميخ ف السيارات..اما الشعب راه ميت ديجا
رفيق الدرب : كعاشقة للخشبة ألا ترين معي ان الركح الحكومي المغربي هو نفسه مند سنوات لم يتغير فيه شيء ؟ ممثلون يتشابهون والمسرحية هزلية هزيلة والمتفرجون ادمت قلوبهم الفرجة الرديئة..ولا حل سوى قول الله يخد الحق بعد كل اسدال للستار ؟
ثريا جبران : ما خصناش نكونو عدميين عوتاني حتال هاد الدرجة..الحمدلله عندنا مليك شاب و..
رفيق الدرب : (مقاطعا ) السيد ف العقد الخامس ديالو وانتما باغين تخلينو شاب بزز منو..لقيتوها مسلكاكم..واااا صباغة عندكم
ثريا جبران : وايني راك ماتسواش..خليني غير نكمل كلامي بعدا مالك كطير من المقلة..إييه أ سيدي شاب والمغرب اليوم غير مغرب ديال البارح..وهانينا دابا تجيبها فراسك..خليني نتذوق حقي من كعكة الوطن بسلام
رفيق الدرب : اليوم وانت وزيرة للثقافة هل لك ان توجزي لنا معنى كلمة ثقافة في كلمة ونصف
ثريا جبران : طَقْ طَبَق رْطَق
رفيق الدرب : بمعنى ؟
ثريا جبران : ماكاين غير النشاط ها هو شاط..اقسم بأن أحول مآتمكم وجنائزكم الى مهرجانات لا تنتهي
رفيق الدرب :بعيدا عن صداع حكومتنا الجوطابل هل لك ان تطلعي قراء وزوار مدونتي على مشاريعك الفنية بالمستقبل القريب
ثريا جبران : اول شي سوف آخد كونجي من الوزارة لأتفرغ للتخمام حول آش غادية ندير بـ 7 ديال المليون للشهر وايضا لاخلد للراحة بعد شهر من العمل المضني تبعته صدمة عنيفة اجد نفسي محتاجة لفترة نقاهة استرجع فيها قواي و بهدا الصدد فقد قررت ان اغتنم مناسبة تواجدي رفقة زوجي عبد الواحد عوزري للمشاركة بافتتاح فعاليات الاسبوع الثقافي في روسيا ومنها حجة وزيارة ياااااااك كلشي فابور..
رفيق الدرب : فعلا كلشي من ظهر الشعب..ويلا عطاك العاطي لا تحرث لا تواطي..ولكن فرشتيها منين عينتي راجلك مديراا لديوان الوزارة..أواااااه بدينا الزبونية والمحسوبية قبل السلام وعليكم
ثريا جبران : وياك راجلي ماشي صاحبي..ايوا اولدي راه كيقولو وراء كل رجل عظيم امراة..اللهم ف بو بناتي ولا ف لبراني..علاه ما شفتيش عبيبيس اللي اجمع كاع اهل فاس وبغا يديرهم وزرا..ولا ليازغي بوشلاقم مشا يرغب شي وزير باش يخدم ليه ولدو المبيطل ف الديوان ديال وزارتو..راه هدا هو المغريب ما كاين غير راسي يا راسي..وهالعار يلا ما عيقو تنتوما شوية
رفيق الدرب : فعلا . كنحييك على صراحتك وجرأتك ..و بنهاية هاد الحوار القصير لا يسعني الا ان احييك تحية مسرحية عالية على هدا الحوار الكوميدي الفج الممتع سهلا واهلا بك يا النحلة..دامت سخريتك..ودمت انت وباقي زملائك بالحكومة اهلا للسخرية ومادة لها
ثريا جبران : الله يقدرنا..الله يقدرنا..الله يقدرنا
حاورها رفيق الدرب
الحوار افتراضي لكن ربما الحقيقة تتربع بين سطوره
الحوار افتراضي لكن ربما الحقيقة تتربع بين سطوره
